Tatli me arra dhe sherbet – ëmbëlsirë e butë dhe plot shije

Tatli me arra dhe sherbet është një ëmbëlsirë shtëpie, e butë dhe plot shije, që përgatitet me përbërës të thjeshtë. Arrat e copëtuara dhe aroma e kanellës i japin një shije të veçantë, ndërsa sherbeti e bën të njomë dhe të shijshme. Përgatitet në një tepsi, pritet në porcione dhe zbukurohet me fistikë të bluar. Mund ta shërbesh siç është ose me një top akulloreje, për një ëmbëlsirë edhe më të veçantë.

Përbërësit

Për brumin:

3 vezë

250 g sheqer

280 ml vaj vegjetal

300 ml qumësht

450 g miell (i ndarë në dy pjesë nga 225 g)

2 lugë çaji pluhur për pjekje

1 lugë çaji sodë buke

1 lugë çaji kanellë pluhur

200 g arra të copëtuara

Për sherbetin:

700 ml ujë

600 g sheqer

2 shkopinj kanelle

Për dekorim:

Fistikë të bluar, sipas dëshirës

Akullore për servirje, sipas dëshirës

Përgatitja

1. Rrahja e vezëve me sheqerin

Në një enë vendosi vezët dhe sheqerin. Rrahi me mikser derisa përzierja të zbardhet dhe të fryhet.

2. Shtimi i përbërësve të lëngshëm dhe përbërësve të thatë

Shto vajin vegjetal, qumështin, 225 g miell, pluhurin për pjekje, sodën e bukës dhe kanellën pluhur. Përzieji me mikser derisa përbërësit të kombinohen mirë.

3. Përzierja e miellit me arrat

Në një enë tjetër përziej 225 g miellin e mbetur me arrat e copëtuara, derisa të shpërndahen njëtrajtshëm.

4. Bashkimi i përzierjeve

Hidhe përzierjen e vezëve në enën me miell dhe arra. Përzieji me një shpatull silikoni derisa të formohet një brumë i njëtrajtshëm, pa kokrra mielli.

5. Hedhja e brumit në tepsi

Lyeje me gjalpë fundin dhe anët e një tepsie me përmasa 30 × 35 cm. Hidhe brumin në tepsi dhe shpërndaje njëtrajtshëm në të gjithë sipërfaqen.

6. Pjekja

Piqe në furrën e parangrohur në 180°C për 30–35 minuta, derisa tatliu të marrë ngjyrë të artë dhe të piqet mirë. Nxirre nga furra dhe lëre të ftohet pak para se ta presësh në porcione.

Përgatitja e sherbetit

7. Zierja e sherbetit

Në një tenxhere vendos ujin, sheqerin dhe shkopinjtë e kanellës. Lëri të ziejnë në temperaturë të lartë derisa sa të vlojë. Pastaj ule temperaturën në mesatare dhe vazhdo zierjen për 15–20 minuta, derisa sherbeti të trashet pak.

8. Ftohja e sherbetit dhe hedhja mbi tatli

Lëre sherbetin të ftohet në temperaturë dhome për 15–20 minuta. Pastaj hidhe gradualisht me garuzhde mbi të gjithë sipërfaqen e tatliut të prerë, duke u kujdesur që të shpërndahet njëtrajtshëm.

9. Ftohja në frigorifer

Lëre ëmbëlsirën të ftohet plotësisht në temperaturë dhome. Pastaj mbuloje me folie plastike dhe vendose në frigorifer derisa të ftohet mirë.

10. Dekorimi dhe servirja

Para servirjes, spërkate secilën copë me fistikë të bluar. Shërbeje sipas dëshirës, vetëm ose me një top akulloreje.

Këshilla për përgatitjen e tatliut

• Ndarja e miellit: Miellin prej 450 g ndaje në dy pjesë të barabarta, nga 225 g secila. Pjesën e parë shtoje te përzierja e vezëve së bashku me pluhurin për pjekje, sodën e bukës dhe kanellën. Pjesën e dytë përzieje veçmas me arrat e copëtuara dhe pastaj bashkoje me përzierjen e parë. Kjo mënyrë ndihmon që arrat të shpërndahen më njëtrajtshëm në brumë.
• Për arrat: Mos i bluaj shumë imët, sepse copat e vogla u japin më shumë shije dhe strukturë.
• Për sherbetin: Lëre të ftohet pak para se ta hedhësh mbi tatli.
• Për shije më të mirë: Pasi ta hedhësh sherbetin, lëre tatliun të pushojë për disa orë, që ta përthithë mirë.
• Për servirje: Zbukuroje me fistikë të bluar dhe, sipas dëshirës, shërbeje me një top akulloreje.